.okaun. .junpen. no'u la .telesan. / OKAŬ Ĵunpe aŭ Telesa / OKAU Junpe eller Telesa / 大川純平 テレサ

ni'o di'e te sitna lo selkarni be la cukan kiniobin be'o no'u la'e lu
lo ka fengu noi carna pe'a ku'o pe'a je lo selcni ganri'e pe'a
li'u lu'u be fi'e la tanakan iukon no'u la'o zoi 田中たなか優子ゆうこ zoi

ni'o lo nu po'o lo taxdakli co'a farlu cu rinka lo nu cinmo tai lo nu lo risna cu plipe lo bartu
i je ba bo lo nu djuno lo du'u lo cifnu na se xrani fau rinka lo nu klaku
i la'e di'u se lifri fadni la'a
i ku'i mu'ei lo du'u lo taxdakli cu barda tai tu'a lo bradi'u kei je du'u lo ponse be ri cu daspo lo jgina ji'a sai kei lo prenu cu mlugau vo'a lo ka na jundi
i tolzau lo selsre poi nalvai ku'o gije ku'i na jundi lo balpalci

ni'o pa mo'o lo ka drani kei poi na cnikangau

ni'o ku'i bu'u lo cabycedra kluce'u lo balpalci ka'u cu dunli ma
i lo tokion dicnenkagni cu balpalci vau xu
i lo se ke jecta briju cu go'i vau xu
i lo ratnenfanri cu go'i vau xu
i mi te preti fi di'u ki'u lo nu ca lo purdei mi mutce pensi fau lo nu tcidu lo cipra selci'a be lo ve ke vo va'e ckule
i se cusku fa di'e
i lu fau lo nu tadni lo kluce'u je lo ra'u jitro nu tolzau co'a te jimpe fa lo se pacydji be lo jitro be'o ku ra'u nai je lo ra'u jalge be lo nu lo remna cu djica gija lazni
i go'i fa lo ka tsali gija pamei manri kei ra'u nai je lo ka ra'u lo jitro nunsre li'u
i je lo velcu'e cu ranji cusku lu
na prali fa lo nu bradi fi'o se jdice lo du'u lo jitro cu palci
li'u
i la'e di'u se krinu lo nu lo du'u vrude gijo nai palci cu se jdice ma'i lo so'imei
i ji'a lo velcu'e cu lanli gije cusku lo du'u tu'a lo ratnenfanri cu jitro nunki'i kei je lo du'u mi'a ji'a jitro
i fu'e ti'e ma'i la'e di'u lo sosoce'isi'e noi selca'u la iolstrit no'u la'o zoi Wall Street zoi cu dunli lo pace'isi'e be piro lo xabju be lo terdi be'o be'o noi ricfu
i ja'o no da se cmene zo bradi ka'u
i je ja'o nalxlu fa lo nu gumdzucpe
i fu'e lo nunda'a termo'a ku na je fu'o ti'e lo nu cnegau vo'a kei je nu ckini cu daspo lo jitro nunki'i kei gije finti ri poi cnino
i ra'u na prali fa lo nu damba fu'o
i la'e di'u lanli jalge pe lo cipra selci'a

ni'o xamgu ke cipra selci'a
i logji drani
i ku'i da cinza
i zo cinza bi'u nai gau mi se smuni na'e bo lo smuni be zo srera
i la'a drani
i ji'a go'e na'e bo lo smuni be zo tolfadni fi'o te karbi lo drata
i lo pensytadji caku cu fadni gije ca'o tolfadni na sai gije bo ralju

ni'o ja'o ma cizra
i sa'u lo nu claxu lo selcni
i na cnikangau
i ciska lo po'o srana be lo ka'u krinu be lo nu na damba
i je na se facki fa tu'a lo sinxa be lo nu selcni ka'u pu co'a ku kei no'u lo mu'a nu fengu fe'e co'a lo pe'a midju be lo xadni kei ja nu kecti fau lo nu cinmo lo ka ralci fa lo verba

li'o

ni'o lo prenu pu cinmo lo vrici noi pe'a fe'e za'o se tisna
i di'u se pensi mi
i ku'i so'o prenu cu jmive fau lo nu ri po'o me la'e lu djuno cau lo xadni kei li'u noi te sitna la utcidan takacin [to'i la'o zoi 内山うちやま節たかし zoi toi]
i la'a ru'e la'e lu lo jitro nunsre li'u noi te sitna lo velcu'e cu dunli lo remna nunsre ku na je lo nu kunti nunsre
i mu'ei lo du'u lo nunsre cu se krinu lo nu na pensi kei ku na je lo nu na cinmo cu co'e
i ua banli je xlali nunsre
i la'e di'u nu balpalci ti'e ju'o sai
i mu'ei lo du'u na go'i kei ma go'i

[to'i di'u te sitna la cukan kiniobin be de'i li renopapa pi'e pare pi'e reci be'o noi jefkarni ku'o fi'o papri lo vei rere bi'o reci moi toi]