mi ca'o mo (to xu mi fu'e ka'u dukse curmi tu'a fu'o lo verba toi)

[to'i mi fanva lo mi selkarni be de'i li renopapa pi'e so pi'e reze be'o noi ciska te galfi lo selkarni be de'i li renopapa pi'e so pi'e rexa]

ni'o ba'a nai zdile bu'u lo panko fa lo nu penmi lo verba noi cusku zo bebna so'e roi

ni'o mi jinvi lo du'u lo makcu prenu cu me la'e zo bebna
i ja'e bo lo nu mi noi ca lo pu zi djedi binxo lo zatra'i be lo ua nanca be li cino cu te cusku zo bebna na mukti lo nu mi tolzansku

ni'o mi penmi lo drani larfi'i vau ui ji'a
i mi mutce manci lo ka ri jundi lo nu ranji lo nu pirfi'i kei fau lo nu ji'a sai lo bolci co tikpa kelci cu janli lo stedu
i ji'a sai tigni lo nu te pixra fi lo dertu canre kei ue
i mi zgana lo nu lo pixra bi'u nai gau se vimcu ta'i lo nu virnu
i je mi fi'o simsa lo nu da poi prenu ku'o fau lo nu lamji zgana lo nu la jon singer sarjent co'a terxra jai galfi lo sutra ke ctile pixra lo mutce drata kei je nu lo bi'u nai sutra ke ctile pixra poi vifne gau se vimcu ta'i lo nu kusru ri'a jai lakne fai lo nu co'a klaku kei cu'u da kei mi fau lo nu zgana lo nu lo pixra noi xamgu cu se vimcu ri'a mutce badri gije ku'i se spaji manci
i la'e di'u ju'o sai ckaji lo ka larfi'i

ni'o fasnu fa lo nu lo jdini dakli cu se lebna kei ji'a
i mi noi djuno lo fadni cu cusku lu
i'e nai ro'a lebna lo jdini dakli
li'u zi ba
i ku'i y

ni'o la'e di'u cizra
i zasti fa lo pindi poi pagbu lo kluce'u
i je pe'i ja'o lo nu ponse lo jdini fau kei sa'u cu simsa lo nu zerle'a kei fau
i ji'a ta'e tadji lo nu jerna lo jdini kei fa lo nu zukte da poi ke'a na drani xamgu ma'i zi'e ku'i poi ke'a te minde zi'e poi ja'o ke'a palci
i jo'a mi ji'a me la'e zo bebna ta'i

ni'o la'a ru'e xamgu fa lo nu da'i cusku lu
i'e nai ro'e lebna lo jdini dakli lo pindi no'u mu'a mi
li'u do'a nai gije ta'i bo jdice tu'a lo te lebna

ni'o mi'a se sance lo mutce savru
i je mi toltce xanka jundi lo nu lo nalci'oni'u poi ze'u catlu mi'a
i ju'o ru'e mi jai se jinvi fai lo du'u mi noi lo makcu prenu cu curmi lo nu lo verba cu zukte lo vo'a se djica kei i'e nai ru'e kei gije fu'e ka'u dukse curmi tu'a fu'o lo verba
i mi'a gasnu lo nu lo panko cu ui nai binxo lo festi kalsa kei ji'a

ni'o ku'i fa mu'a lo nabmi no'u lo nu kalsa fesgau ka'e te jinvi lo du'u fuzme fa lo fesgau na je lo cupra be lo se fesgau poi na binxo lo dertu fi'o se balvi lo nu se fesgau
i ja'e bo lu
palci fa lo nu kalsa fesgau
li'u cu tolnu'i selji'i
i ji'a la'e di'u na ckaji lo ka ei te fengu ta'i lo nu jundi

(to ku'i mi jinvi lo du'u lo nu lo panko cu festi kalsa ta'i tu'a lo pelji cu nabmi ju'o ru'e kei gije cnici gasnu fi'o se balvi ku toi)

ni'o mi ta'e ku fau ro nu lo verba cu bu'a kei poi na xrani lo bu'a ja lo drata poi prenu cu kajde cusku na  (to ji'a lo nu lo verba cu zukte lo nu na tinbe lo se ke kajde cusku kei kei da'i cu se krinu da vau ju'o
i je au la'e di'u se smadi mi ro roi toi)

i mi ca ca'o xenru lo nu mi mi'epre tolzansku lu
i'e nai renro lo canre
li'u
i nabmi fa ma poi srana lo nu renro lo canre mi
i mi ka'e lumci e'u sai mi mu'ei lo du'u binxo lo toljinsa
i ra'u mi na co'a morsi ri'a lo nu te renro lo canre
i fau ku mi bilga lo nu cusku lo du'u i'e nai co'e fau lo nu mutce citno cu jibni kei ki'u lo nu raktu fa lo nu nenri lo kanla ja moklu kei da'i
i je ta'i bo go'i lo nu jdice tu'a lo tcini

ni'o mi traji lo ka xenru la'e di'e vau ku'i
i mi fau lo nu tavla fi lo nu xu kau klama tu za'u re'u ku cu cusku fi lo verba poi tarti lo vlile zo'o ku'o (to pa lo verba poi co'e toi) fe lu
e'u nai pa do klama ti
li'u
i ju'o mi djica lo nu xalbo
i ku'i de'u valsi gije ei cai na se cusku lo makcu lo verba
i mi sutra lo nu cusku galfi lo selsku
i je ku'i mi pacna lo nu lo valsi na ranji lo nu te morji fi lo verba bi'u nai
i ji'a ai mi xenru cusku fau lo nu penmi za'u re'u
i je ji'a ai fau ku mi cusku jai galfi
i go'i se cu'u lu
mi gleki lo nu do klama
li'u
i go'i fau lo nu tarti lo mutce vlile ku zo'o kei ji'a sai

ni'o go'i mu'ei lo du'u penmi za'u re'u