lo te sitna be la xondan katuitin

ni'o mi fanva lo mi se karni be de'i li renopapa pi'e so pi'e pano be'o la lojban lo banjupunu di'e

ni'o lu
au mi za'u re'u sai sitna la'e lu
lo logji be ma'i lo se catra be lo mamta
li'u lu'u noi se finti la xondan katuitin

ni'o lu

lo raktu be lo rirni be'o no'u lo nu ze'u kurji lo bilmagubino panzi cu pilji lo nu kurji lo kanra panzi kei fi la'a li pano na je li panono vau pe'i
i tu'a lo bi'u nai raktu cu jai nandu ju'o sai lo drata be lo lifri fai lo nu smadi
i ji'a lo balvi po'u lo nu lo panzi mu'ei lo du'u do'a nai ui binxo lo makcu ba lo bi'u nai raktu cu jmive ranji gije ui nai ze'e mutce xadri'u cu se pensi gije fau simlu lo ka mutce lo ka se dunku gije fau lo nu ra'u zvati lo gugdejupu noi gugde co cemdju ke tolyli'e farvi cu se jmina gije zmadu lo xadni raktu lo ka se steba lo rirni

li'o

ni'o ta'o nai lo mamta pu galfi lo se pensi gije xruti lo zdani
i mi na djuno lo du'u ma kau pruce fi lo nu galfi lo se pensi
i je ku'i lo nu lo mamta cu jdice lo du'u kansa jmive cu se gleki ro lo se lanzi
i ku'i ma'i la setsukon la'e de'u zmadu fi lo ka drata sai fe la'e lu
xamgu
li'u poi se pensi lo patfu je mi
i ie lo citmau mensi cu cifnu gije djuno na gije ku'i ra'u na pensi lu
au morsi
li'u
i lo nu gau morsi fi'o kansa lo mamta cu dunli lo nu se catra kei vau sa'u
i da'i lo balvi cu simsa lo mutce be lo ka betri
i ku'i di'e se pensi lo rirni je na lo panzi
i ja'e bo lo nu lo mamta ca la'e de'u cu galfi lo se pensi cu nu jdice co se gleki ma'i lo mamta ku ju'o
i ba ze'u sai ku lo mamta fi'o te tavla la setsukon lu
budjo cevni vau pe'a
li'u cusku co xalbo gije la'a cusku tu'a lo se cinmo be fi la'e de'u ta'i tu'a lo fadni prenu

li'o

ni'o xu fi'o se srana lo bilmagubino je ji'a ro xadri'u cu cumki fa lo nu ki'u lo nu ka'enri'u kei po'o cu pensi lo du'u au morsi gija catra vo'a
i ie la'a lo xadri'u poi ba'o catra vo'a cu catra vo'a ki'u lo nu djica lo nu morsi
i ku'i fau lo nu lanli lo krinu be lo nu co'a pensi lo nu au morsi cu se facki fa la'a lo du'u pi ro krinu cu dunli lo nu ka'enri'u kei na
i je go'i lo du'u ki'u lo tolnu'i be ki'u lo nu ka'enri'u zi'e noi vrici ku'o joi xlali jecta cu ka'u nai gau catra vo'a gije va'i sa'u gau se catra
i ro prenu cu djica lo nu jmive
i lo ni mutce ji'a sai lo ka tolzi'e cu djica lo nu jmive fi'o se simsa ie sai lo nu lo kanro cu pensi lo si'o au jmive
i na'i go'i
i ki'u ju'o lo nu tolzi'e cu jundi sanji la'e di'u
i za'a cafne fa lo nu lo kanro co'a lo nu binxo lo bilma cu pensi lo si'o au jmive
i je ku'i lo xadri'u cu jmive fau lo nu djca la'e di'u ze'e

li'o

ni'o lo cpedu selsku be lo bilmagubino be'o ku poi simsa la'e di'u pu se tcidu mi re cukta noi pu zi se prina co ciska minji
i ri du la'e lu
lo solfagri
li'u lu'u noi se finti la iokotan xirosin joi la'e lu
lo nu jmive gije bilmagubino
li'u lu'u noi se finti la iokotsukan koitcin
i ro lo remei cu cmima lo me la'e lu
blanu grasu
li'u kanagauan bende
i lo cukta ku bi'u nai cu ve cusku di'e mu'a

ni'o lu

ki'u ma ko'a (to ko'a goi lo mamta poi catra lo panzi toi) co'a catra djica
i ei ro'e lo nu catra djica kei bi'u nai cu jicmu lo nu casnu lo nabmi
i cu'u ko'a ko'a pensi lu
lo panzi zo'u na cumki fa lo nu se mikce
i lo nu morsi cu zmadu fi lo ka gleki fe lo nu jmive ta'i ku o'a nai
li'u vau ti'e
i nabmi fa lo nu ai manri lo nu vamji lo remna kei fa lo nu xu kau ka'e se mikce kei ja lo nu xu kau ka'e gunka
i lo ka'enri'u ki'u lo bi'u nai nu manri lo nu vamji kei je lo nu lo na'e gunka na prenu cu te jimpe lo du'u bilga lo nu na zasti kei gije zasti kei gije ze'e rinju

ni'o lo rirni joi tunba be lo ka'enri'u cu ei kansa ri lo nu damba lo kluce'u nu raktu be ta'i lo bi'u nai nu manri lo nu vamji
i ku'i sai ko'a kansa lo ri'urgau gije pe'a fargau lo panzi be vo'a lo balre
i cu'u lo cemdju srana gunka poi mi tavla ke'a lo bi'u nai selsnu ku'o ve cu'u ji'a lo xatra poi se benji fi lo djekarni kagni ku'o se jinvi fa lu
ei na sfasa lo mamta noi selke'i
i do gasnu lo nu lo mamta cu jai madzei
i ie pei bilga lo nu kecti lo mamta
li'u
i je ku'i la'e di'u nu nuncni jicmu casnu fi'o se tolmo'i tu'a lo jicmu be lo nu catra djica kei be'o ku bi'u nai gije jarco lo ka tolnu'i zgana mi noi ka'enri'u gije tolnu'i jinvi fi ri
i la'a cu'i lo du'u la'e di'u ka tolnu'i jinvi co'a se jimpe do zi nai
i je ku'i la'e di'u se krinu lo nu lo ka tolnu'i jinvi kei bi'u nai bu'u lo cabna kluce'u ca'o mutce lo ka fadni

ni'o pe'i mi se pi'o lo mupli po'u lo sonmin zekri ku i'u dai gasnu lo nu co'a se jimpe
i la kalin noi sonci co jatna'ofupa gije catra tu'onono na'e sonci poi se gugdevunu ku'o gije se ki'u bo cu'u fuzme gije jai se pajni fai lo nu ze'e pinfu cu jai se cusku lo blabi prenu cecmu ta'i lo nu junri kei fai lu
ei sidju la kalin noi se kecti
li'u je lu
i'e nai gasnu lo nu la kalin ku po'o fuzme
li'u
i la'e di'u krinu lo nu la nikson cu pilno lo jatna catni lo nu gau binxo lo simsa be lo jai nalzekri
i ji'a la jirard noi sonci co re va'e certu noi catra lo se gugdejupu ke stagi kurji ninmu gije jai se pajni lo gugdejupu pajni zo'u lo blabi prenu cecmu cu junri lo nu cusku lo du'u ei sidju la jirad noi pe'a lamni verba
i ma'i lo blabi prenu lo se xazdo cu se lijda lo drata gije cilce natmi
i je ti'e na mapti fa lo nu lo kamdra manri logji cu se pilno
i je ti'e ji'a fengu sai lo nu lo blabi prenu cu se jai pajni lo cilce natmi noi mleca fi lo ka vajni ku (to te sitna la'e lu
lo nu jmive gije bilmagubino
li'u toi)

ni'o lu
mi na jinvi lo du'u lo besna morsi remna cu prenu
i ei lo ka'e nai selfu poi remna cu se vimcu fi lo kluce'u
i lo po'o prenu poi troci te zu'e lo kluce'u nungei je lo balklu nunfarvi ku'o je lo po'o prenu poi kakne lo nu selfu lo nunfarvi cu vajni
i je i'e nai sai lo mutce ka'enri'u ja lo tolci'o menri'u cu da'i cusku lu
ko kurji mi
li'u
li'u

i di'u fi'o te ciska lo se karni be la cukan asaxin bei de'i li pasozere pi'e pano pi'e reze be'o noi se cmene lu
lo selji'i be lo gau nalcromro be'o noi na se cusku
li'u cu se cusku la otan tenrein noi ba'o gugde flakamni cmima zi'e noi zukte fi lo nu gasnu lo nu co'a bende fa da poi se cmene lu
gugdejupu nalcromro bende
li'u
i lo bi'u nai se cusku noi na sai jai se cumki fai lo nu se curmi mi noi bilmagubino kei ku'o zi'e noi jai se bilga sai fai lo nu na se curmi cu catra lo bilmagubino gije jarco lo jicmu se tarti je lo jetnu selcni vu'o poi se frati fi ro ka'enri'u nabmi zi'e no'u mu'a lo nu cusku lo du'u ro mutce ka'enri'u cu xabju lo girzu zdani kei fo lo cnino ke jdiske ke mumna'a platu noi te spuda fi lo jdiske kamni de'i li re pi'e bi ku'o kei je lo ra'u nu co'e fa lo vajni bandu flalu ke galfi se stidi noi se steci lo nu tarbi catlu kei ra'u
i pa mai ei mi di'u cusku

ni'o rapli fau ro nu lo bilmagubino cu se catra kei fa lo nu ze'i solpre saurgau lo du'u lo xokau girzu zdani cu na banzu kei kei je lo nu solpre stidi lo nu ei sidju lo rirni poi catra kei kei vu'o noi ckaji lo ka ce'u se tarti lo na'e ka'eri'u se cu'u lu
ei lo nalse'u cu se vimcu fi lo kluce'u
li'u
i ei lo se tarti ku bi'u nai cu se galfi
i fu'e va'i xadni ja menli catra vimcu lo ka'enri'u lo kluce'u fa lo catni terganzu noi mu'a gugde ku'o ku po'o nai
i srana lo ji'a galfi jecyxlube'e noi carmi darlu lo nu ka'enri'u cemdju
i je go'i lo cnino ke galfi jecyxlube'e ku ji'a [to'i du la'o zoi 新左翼 zoi toi] noi gasnu lo nu pagbu fa lo nu zifygau lo ka'enri'u ka'u kei lo nu catni damba
i je go'i lo ji'a sai rirni noi li'a sampu fuzme lo nu benji mi lo bu'u munje
i vimcu fa ji'a lo ke citno solfagri ke'e pe'a noi se cinmo lo na'e ka'eri'u fu'o
i ei la'e di'u se jundi
i pe'i mu'ei lo du'u na go'i na cfari fa lo nu ka'enri'u ke solpre stidi
i ju'o na frili fa lo tcini be mi ja'e lo nu xamgu fa lo pu se zukte be mi be'o je lo ca zukte be so'e ka'enri'u be'o vu'o no'u lo nu solpre stidi lo du'u e'o jimpe fi lo ka'enri'u kei ja lo du'u ai binxo lo simsa be lo na'e ka'eri'u fu'e fi'o te zenba lo tolmutce fu'o do'a nai
li'u
(to la'e di'u cu te sitna la'e lu
lo solfagri
li'u toi)

ni'o la'e di'u noi logji zi'e poi se cusku la otan tenrein fi'o mupli lo drata sai cu mutce lo ka simsa lo logji be lo nunfarvi ka'u poi bu'u lo pi ro gugdejupu ca'o fasnu
i fu'e te zu'e lo kluce'u nungei je lo balklu nunfarvi fu'o ti'e lo girzu pulj cu gunta lo xabju be lo stuzi be lo selpla nunzba be fi lo srana be lo cinkansen [to'i noi sutra trene toi] be'o je lo naritan ke vinji tcana je lo nenfanri je lo fanri
i la'e di'u logji gije ze'e pu se pilno lo gunta lo nu cu gunma catra
i je go'i lo gugde'usu ke blabi prenu lo nu solprecatra lo lidne xabju (to lo ka'u gugde'usu indian toi)
i je go'i lo gugdejupu jenmi lo nu solprecatra lo se gugdecunu
i je go'i lo gugdedu'e poi nazis lo nu solprecatra lo xebro prenu
i je go'i lo gugde'usu jenmi lo nu solprecatra lo se gugdevunu

ni'o logji lo nu vimcu lo ruble prenu ja lo sotmei girzu
i lo logji bi'u nai ku ju'o drani bradi fi lo nu co'e fu'e tezu'e lo kluce'u nungei je lo balklu nunfarvi fu'o ti'e vau ie pei
(to te sitna la ctaru poi karni de'i li pasozevo pi'e papa toi)

[to'i di'u te sitna la'e lu
lo logji be ma'i lo se catra be lo mamta
li'u lu'u noi pagbu la'e lu
lo logji be ma'i lo se catra
li'u lu'u noi se finti la xondan katuitin zi'e se ckupra la asaxin cinbun noi kagni be'o de'i li pasobire
i go'i fi'o papri lo pano moi bi'o paxa moi toi]

ni'o di'e se ciska pu za lo nanca be li cino bi'i vono
i ku'i lo tcini cu stodi
i mupli fi lo go'i fa tu'a lo gugde'usu joi gugdejupu terki'i ke jenmi tertu'i
i tu'a ri se tsidu fi la'o zoi  http://mail.jcp.or.jp/akahata/aik11/2011-09-08/2011090801_01_1.html  zoi
[to'i lo selkarni be bau lo banjupunu be'o noi srana repano ki'o zekri ja cuntu be gau lo gugde'usu jenmi bei bu'u lo gugdejupu be de'i li pasomure bi'o renopano be'o je panobibi se gugdejupu noi se catra toi]

li'u