lo makcu cu djica lo nu se ctuca lo verba

[to'i mi fanva lo mi selkarni be dei li renopapa pi'e so pi'e reze toi]

ni'o la'e di'e se lidne lo lidne selkarni selci'a

ni'o ju'o sai mi se ctuca fo lo so'imei ca lo pa ua sai djedi

ni'o lo nunkei poi se cmene zo kauarionin ju'o ku'o ku ji'a cu ve ctuca
i la'e di'u te pilno lo sakli tsina
i pa prenu cu troci lo nu kavbu lo prenu poi cliva lo sakli tsina gije troci lo nu pagre lo canre stuzi
i je lo se kavbu cu basti lo kavbu fau lo nu se kavbu
i na se curmi fa lo nu lo kavbu cu pencu lo sakli tsina kei je lo nu cliva lo canre stuzi kei ji'a
i je ca lo nu lo cpana be lo sakli tsina cu su'eremei cu se curmi fa lo nu plipe
i je ca lo nu pamei cu se curmi fa lo nu cpare lo sakli tsina
i fi'o mupli la'e di'u lo so'imei cu se javni
i je ku'i ue sai zdile fa tu'a lo javni

ni'o la akikauan iumin noi pemfi'i gije ji'a ciska lo lisri cu cusku lu
lo makcu lo verba ka'e ctuca fo lo javni ku po'o
i je ku'i lo verba mi'o ctuca fo lo ka xendo je lo ka zifre
li'u (to te sitna la'e lu
lo likselpanci binxo nixli
li'u lu'u noi se finti la akikauan iumin joi la okamoton iocikon zi'e noi se ckupra la bunken cupan de'i li pasosoxa toi)

ni'o mi ze'u lo nanca cu jinvi lo du'u lo makcu cu ctuca fo lo javni
i ku'i na ku lo verba cu claxu lo javni ka'u

ni'o li'a lo javni ka'u pe lo nunkei ku bi'u nai drata lo javni ka'u poi lo makcu cu ctuca fo ke'a

ni'o ua javni te zu'e lo nu se zdile
i za'a xendo se javni fa lo nu fau lo nu lo citno verba cu se co'e cu ti'e binxo lo na'e gunta ckaji kei ji'a

ni'o lo javni cu te remei vau xu ja'o
i go'i fi da poi javni gije jai te minde fau lo mu'a nu nupre lo nu mu'ei lo du'u na tinbe lo javni ka'e nai jmive ranji kei ja nu ai le'o mu'ei tarti lo ka vlile ku'o joi de poi javni gije jai se zukte fi lo nu se zdile

ni'o mi fi'o se balvi lo nu co'a pensi di'u cu desku ze'e

ni'o ua la'e de'u tadji pi'o lo verba
i la'e de'u tadji lo nu lo verba cu bu'a lo se javni
i la'e de'u tadji lo nu galfi lo smuni be lo javni kei pi'o lo verba

ni'o au mi cusku fe ji'a tu'a lo tadji be tu'a lo selcmi

ni'o bu'u lo panka lo prenu cu te so'omei lo selcmi
i je ti'e na ku ro lo bu'u prenu cu pendo
i lo nunkei poi te pilno lo sakli tsina na cumki fau lo nu ri se pilno lo drata selcmi
i ku'i fau lo nu smadi lo du'u ri cliva ca ma kau cu sutra muvdu lo sakli tsina
i je lo nu lo girzu cu pilno lo sakli tsina cu basti lo nu lo girzu cu co'e kei cau lo raktu
i ue sai ka go'i

ni'o pe'i la'e di'u simsa tu'a lo kalte joi crepu gije mutce lo ka ce'u jai sidju fi tu'a lo munje poi claxu lo nu xarci janmi

ni'o tavla na
i lo selcmi cau lo nu tavla cu simxu lo nu jai se smadi ja jai se jimpe

ni'o ji'a fau lo nu lo verba poi na cmima ku'o ca lo selcmi nunkei poi te pilno lo sakli tsina co'a cpana ri kei lo nunkei cu se sisti ta'i lo rarna
i vimcu fi lo stuzi na

ni'o mi na zukte fi lo nu tadni gija se ctuca kei fe lo nu klama lo panka (to mi ca lo nu zukte fi lo nu te pixra co'a jikca gau da poi selcmi
i ja'e bo lo lidne selkarni cu se cmene lu
mi ca'o mo
li'u toi)
i lo nu ka'e se ctuca fau lo nu na kampe lo nu se ctuca cu se gleki mi

ni'o lo nu jai zdile lo verba cu zmadu lo nu gunta lo makcu kei lo ka mi djica