cteki lo selve'u

ni'oni'o lo cteki be lo selve'u goi ko'a cu ca mu ce'i si'e vi la .nixon. noi gugde .i cteki ro selve'u noi vasru lo cidja .i lo turni cu ca djica lo nu zengau ko'a

ni'o xamgu fa la nundarlu noi se karni la .akaxatas. sei djekarni be fi la'e lu .nixon. kaurpo'esi'opre trusragri li'u se'u be de'i li pa pi'e repa .i la nundarlu cu cusku lo du'u la .kany.naoton. noi jatna be la .nixon. ku'o cu me la'e lu tolje'u .ionai li'u cusku

to .i le selkarni cu srana lu lo cteki je lo kulce'u nurgau .i na lacri lo nu lo cteki be lo selve'u cu ba zenba li'u to zoi http://www.jcp.or.jp/akahata/aik10/2011-01-21/2011012101_05_1.html zoi toi gije jungau fi lo du'u la .kany.naoton. cu cusku lo du'u lo rubnu be li pa ze megmeg ca sarcu lo nu kulce'u nurgau kei kei je lo du'u ku'i lo gugde seljerna be fi ko'a ca rubnu be li pa megmeg kei je ja'e bo lo sarcu fa lo nu ko'a cu zenba toi

.i .uinai u'anaisai dai lo nu lo logji je'unai .ionai cu se zanru loi prenu .i mi kansa fi lo nu cinmo

ni'o lo truci'e pu co'a pilno ko'a mu'i lo nu kulce'u nurgau je'unai .iku'i da'inai pu ca jdikygau lo se pleji be fo lo rarna terzenba pe fa lo nu kulce'u nurgau to vi la .nixon. loi tolcitno prenu ca pu mutce lo ka zenba .ije lo selyle'i be fo lo nu kulce'u nurgau cu zenba toi

ni'o mu'i ma pilno ko'a fo lo nu pleji fo lo nu kulce'u nurgau

.i ko'a tolpainu'i ju'osai .i lo ni cmalu fa lo se jerna cu nibli lo ni barda fa lo vamji be ko'a

.i lo barda kagni noi ka'e gasnu lo nu lo jdima be lo selve'u cu zenba fi ko'a cu ca'a pleji no da poi ko'a va'o lo nu ko'a zenba .i ku'i lo milcmalu kagni je lo cmalu kagni vu'o noi vecnu fi lo barda kagni cu ka'e bilga lo nu pleji ko'a

.i lu lo sumji be lo ba'o se jerna fi ko'a cu na'ujbi lo sumji be lo ba'o se cirko be va'o lo nu lo cteki be fi lo kagni cu ba'o jdika li'u

.i la'e di'u je de'u cu pu co'a se djuno mi fi'o se tcidu la .akaxatas. noi djekarni

.i mi noi pu ca se slabu ko'a ba lo nu mi co'a sanji lo vanbi cu na ze'e pu djuno lo du'u zasti fa lo girzu noi se cmene lu lo girzu noi gasnu lo nu na cteki lo selve'u li'u pu lo nu mi co'a tcidu la .akaxatas. kei pu lo nanca be li ci

ni'o srana lo nu tadji be lo nu lanli lo namcu .i fatci fa lo du'u lo se jerna be lo gunka cu ba'o jdika kei zu'u je lo du'u lo se jerna poi se ralte ku'o be lo barda kagni be'o noi vasru lo selpo'e poi ka'e se canja fi lo jdini cu ba'o zenba kei zu'unai .i fatci fa lo du'u lo se pleji be fo lo nu lo kulce'u cu binra kei be fa lo kagni vi la .nixon. cu mutce lo ka cmalu fi'o se karbi fi lo se pleji be lo kagni be vi la .ropnos. .i ji'a fatci fa lo du'u lo cteki fi lo kagni cu vono pi xaso ce'i si'e kei je ku'i lo du'u lo jditadji cu zabna lo barda kagni to la .akaxatas. cusku lu lo cteki fi lo kagni zo'u vono ji'i ce'i si'e gije kargu ti'e .i ku'i da'inai pare ce'i si'e fa lo cteki be fi la .sonis. .ije paxa ce'i si'e fa lo cteki be fi la .sumitomos.kagakus. li'u
to zoi http://www.jcp.or.jp/akahata/aik10/2010-06-24/2010062401_01_1.html zoi toi

ni'oni'o lo poi se jundi ku'o se djekarni .e'u be de'i li rere cu se cmene lu me la'e lu girzu noi galfi la .osakas. li'u .i ku'i fi'o se tolnipygau lo stela cu me la .jimintos. noi trusragri li'u .i lu sei la .matsumoton.tociakin. noi cmima la'e lu girzu be lo nu galfi la .osakas. li'u ku'o cu se srana lo pelji gubnoi je lo mrilu dakli be fi lo pelji cu te snipa lo pelji stela noi te ciska lo cmene be lo trusragri .i va'o lo nu gasnu lo stela cu tolsnipa cu tolcanci fa lo lerfu po'u lu .jimintos. noi trusragri li'u .ue za'a li'u

to la .jimintos. noi trusragri pu cirko lo catni ca lo nu cuxna lo gugde kamni prenu de'i li renopano .i la'e lu girzu noi galfi la .osakas. li'u cu cnino trusragri noi sono ce'i cmima be ke'a ze'e pu cmima la .jimintos. ca lo prulamna'a toi

.i u'icai pixra vi ra